毅行2007完成篇

11月9日星期五，期待已久的正日終於來了！這個週末的天氣好到不得了，天晴，氣溫around19-25度，perfect for 行山！

因菠蘿冰要在2時才出發，4位隊員便一早入西貢一齊食早餐，12時會合支援隊員YM，才坐巴士入起點。可能已是最後出發嘅一組，北潭涌起點無想像中咁熱鬧。找個陰涼位置放下東西，隊員便準備入去登記。

起點 - 北潭涌

 開始時show下對無穿無爛嘅腳

 Team 的裝備

 四個人，一條心。

一點半，隊員都準備好了，行過去起點，順便去廁所…

 出發前，  開開心心出發了！

 行在第一段上，  按時到達第一個水站 ， 上西灣山

第一站 - 西灣

 6:00pm, 到達CP1，個樣幾精神！

YM在他們出發後，便趕回家預備拿去北潭凹support 嘅dinner。

第二站 - 北潭凹

YM7時多便到北潭凹，相信很多之前的support已離開，所以好容易在 CP 附近便找到空位。Settle 半小時後，便看到消防車、救護車雙繼低達，心想，不知是什麼意外呢？(後來卻又找不到新聞報導)。

 消防員上山救人， Team 比預計早到15分鐘

 整理雙腳先，換襪和沈爽身粉；

  準備行第三段，誰知等了半小時才可上山。

第三站 – 水浪窩

 Team 在 12:51am 到達CP3, 水浪窩

 第三個支援點有阿Bill d friend 在水浪窩 camp 兼 support。聽聞留了成個鐘才起程…

聽佢地講，每年在梅子林有得飲嘅薑茶竟然排哂，無得飲…

第四站 – 基維爾

 Team 在6:26am 到達CP4，開始天光，在這裏沒有我地支援，只好用大會預備嘅水同食物。但佢地只要行多陣，到大老山亭，阿Chung 已 “fed-ex” 左d美味早餐等緊佢地了！

  食過早餐後，就要落第一段攞命的石屎路…

第五站 – 畢架山

 Team 9:42am 到達畢架山頂

第六站 – 走私坳

 11:37am 到達走私坳 check point

   到這時，support已在城門BBQ場等得不耐煩，原因係佢地應在11:15am已到BBQ場。於是Sum同YM逆行第六段，準備meet佢地，看看有什麼可以幫手。

 12點半，終於到左城門啦！

 看這對腳，同今年毅行嘅口號幾貼切！

  帝王式嘅按摩服務！

第七站 – 鉛鑛凹

 4:11pm到達鉛鑛凹，看Bill同Fai仲可以半蹲影相，就知有大把貨啦！

第八站 – 荃錦凹

 7:20pm到左荃錦凹，聽講大冒山頂好大風同凍。

 Support team 一早已帶備食物同物資到支援點。搞搞下，都要8:25pm先再起程…

雖然到呢度Jenny雙膝已好痛，兼且已出左水泡，但到呢個地步，梗係撐埋佢啦！

第九站 –  田夫仔

  看上去都好精神，但四個人已目光呆滯，夢遊住咁行…

終點！

呢一刻終於到啦！1:26am，用了35′25″全隊成功完成呢次創舉！

   

 到左休息嘅地方，當然要食番舊菠蘿冰慶祝啦！但最後，都無影佢地”after”嘅腳，因為佢地話，除左對鞋，驚著唔番…

   

全隊人上台領證書，好開心！

 

毅行星期五打到黎啦！

今個星期五（11月9日）就到正日，辛苦了4個月的操練，就在這二天看成績了。今年天公份外幫手，天文台預告星期五到日都好天，而且氣溫保持在20-25度左右，真係perfect到啤！所以今次菠蘿冰如無特發意外，沉著氣應戰，一定會行個好成績出黎！

最後階段的preparation就係食野。最後三日要盡量食多D碳水化合物的食品(唔計糖果啦)，等肌肉store足夠的能量。當日早上更要食個豐富的早餐和飲足水。

 

毅行最後操練之十七 – 麥徑 1 – 3 段

日期：10月27日
路程：麥徑 1 – 3 段
路線：北潭涌 -> 水浪窩
Walkers: Bill, Fai, Jenny

終於，都到了操練的尾聲，由開始到現在，長長短短已行了十七次，大家只希望正日快點來臨，來一次終極考驗！

因為到尾聲的原故，長度要開始縮短，所以只行頭三段。近日天氣真係好正，天晴又唔太熱，希望到時都係咁就真係perfect啦！

YM今次喺北潭凹幫佢地做support，煮D湯通粉比佢地試食。YM去到北潭凹時佢地已經到左，仲沖洗完畢。阿Bill當時已警告話有隻馬騮喺樹上面，稔住一隻o者，唔係成群嘛，無問題嘅。但當準備從袋(已經唔係超市袋)拿食物出來時，隻馬騮眼甘甘咁望住我地，而囉個麥當奴漢堡包出來時，甚至跳落地面兇我地添，除左拿拿林收番埋個包外，阿Bill 同YM仲要輪流攞住二支行山杖，企喺度保護住D食物同食野嘅人！

唉，一隻馬騮都搞到咁煩，如果呢度第日變成城門咁就大件事啦！

 

毅行終極操練之十六 – 麥徑 3 – 8 段

日期：10月19-20日
路程：麥徑 3 - 8 段
路線：北潭凹 -> 水浪窩 -> 沙田坳 -> 畢架山 -> 大埔道 -> 城門水塘 -> 針、草、冒 -> 荃錦坳
長度：53.5km
Walkers: Bill, Hang, Fai (水浪窩加入), Jenny(沙田坳補給，加入)

距離比實日子越來越近，眼見就快可以感受下當日的氣氛，以及擺脫周六的練習，可以正正常常咁去行山去camp，就係呢一次，收到壞消息。YM 的ITBS 未康復，而且行過今次的一段後，似乎更嚴重。她唔好意思咁annouce 話佢今年同唔到我地一齊玩，而我地聽到後，都十分可惜。如此，YM 就係水浪窩離場。

今次練習，沿途上都見到唔少人，尤其係夜晚，回望前一座山，都會見到一組組的燈光在移動著，終於，我地不是孤獨練習啦。不過，去再練習的後段，比人過左頭後，就冇咁熱鬧了。今次練習，係幾個點都有support ，所以身上不用帶太多水，而且，今次除了紀錄時間外，水以及食物都份外留意，原來，水真係唔駛太多，反而野食就要預多點，因為都幾易肚餓。來到沙田坳，試過換隱形眼鏡，的確，眼睛係舒服不少，再滴上眼水，即刻冇咁乾。另外，最後一次服役後勤的Fedex(使命必達)小姐，一手抽住幾L 的水，另一手挽住四個人的麥記早餐，一步一步咁行住大斜路上來，汗流浹背，真係令人肅然起敬。所以，下一任隊長都非佢莫屬。

感覺上，Jenny 係度的時候，行九龍水塘果個第六段，就最多事發生。就好似今次咁，行近條壩時，發現成百隻馬騮企住兩邊欄杆。我地停下來，留意一下，我地都估，應該係大佬打架爭地盤。待馬騮散去，我地走上一段，就見幾百隻的馬騮同我地走向同一個方向，突然間，我地同幾個同行的人 陷入了馬騮海之中。好彩佢地都忙住離開，沒多留意我地，行左一陣，佢地就轉向草地停下了。我都係第一次置身係咁壯觀的地方。

  第一次見咁多馬騮係度晒馬！

去到城門水塘，以及鉛礦凹，非常感謝Angus 及 Tim 的支援。

 

毅行操練十五 – 麥徑 4 – 8 段

日期：10月13日
路程：麥徑 4 - 8 段
路線：水浪窩 -> 沙田坳 -> 畢架山 -> 大埔道 -> 城門水塘 -> 針、草、冒 -> 荃錦坳
長度：43.5km
Walkers: Bill, Hang, Jenny(大埔道補給，加入)

今次係最少人，多謝Bill咁快update左個回顧！ 

終於，來到尾二的長trip 練習，即係話，好快到正日了。

今天，超正的天氣，行山一流。秋涼，有風及冇太陽的陰天。不過，發覺越後的練習，人就越少….起初五個人，到今次起步，得番兩個….。好彩，中途有補給姐姐加入，帶來補給之餘又一齊行，咁先感覺好一點。今次行的人唔多，所以我係唔會公開時間的，因為都唔可以作準。總之，行得完，冇超時啦。

早上某時某分，就係水浪窩出發。輝因公事，朝早join 唔到，所以打算去到沙田坳先加入。(不過，之後收到sms，話要係大埔公路先join到…..再之後，從補給姐姐度先知今次係黎唔到…..)而YM，就休息養傷之中。今次行山，除左陰天唔曬之外，空氣又好，至少深呼吸唔會咳先，遠望又見唔到一層灰啡色的污染物。所以行得特別起勁，另外，終於係山度遇到人了，仲要係唔少，諗起之前練習，都係得自己玩咁，今次就有生氣得多，”早晨”，”hello” 都唔知講左幾多次了。當中，有個外國人放狗，狗狗都本事了，由水浪窩行到大老山，而且佢同佢主人都行得好快，唔係佢地停低食野，都唔會再見得番。來到大老山，出左車路，就打左個surprise 電話，”我地已經到左…”，哈哈，最開心都係呢度。

某時某分，去到沙田坳，士多很熱鬧，好多行山人。我地用了自己的時間小休一下，食左個薑味豆腐花，留意，係自己的時間。轉個頭再出發，行獅子山，一路都以為呢邊ii 多，點知竟然係M104,105標距柱附近見到馬騮，仲要唔止一次添。或者，第時係沙田坳士多，都會見到馬騮了。

又到左某時某分，在過大埔公路天橋時，就見到補給姐姐落巴士。勁，就算schedule 臨時有變，都難唔到佢，準時到達。係度逗左一陣，食下薯蓉，加左水，就繼續了。今日，九龍水塘特別熱鬧，因為….有好多馬騮，冇留心去數，但至少分別見過一百隻以上。而且，令人氣憤的是，見到有d 人係度餵馬騮。佢地無知到完全唔覺呢d 係危險同自私的行為。甚至，有人更駛著私家車來，在保謢之下，戲弄逗玩馬騮，十分過份。這令到馬騮越來越事無忌憚，向途人索取，甚至強搶食物，襲擊人類。我們提高警覺，聯同其他行山人仕，終穿過這個危險地帶。係另一邊廂，我地又發現很多蝴蝶，至少有一百隻圍住棵樹飛，真係奇景。

過左城門水塘，接近針草帽，就見天色都變了。霧氣很重，不時見到針山頂俾雲霧包住。講真，都未試過夜行針草帽。或者係陰天有雲的關係，就算入晚，不用頭燈都可以見到條路。尤其係上大帽山一段，大風，落雨，霧氣重，能見度得十米，LED 頭燈完全被水氣打散，反而唔開仲望得遠。在前路茫茫的情況下，冒著雨前行。今次戴cons，所以唔會有濕眼鏡的事發生，冇咁狼狽。而係大帽山，就好大風，但意外唔係太凍，唔駛架褸都ok。

  大霧又大風的一晚。

過左山頂，頂住小腿酸痛，走住最唔鍾意的下山車路落山。在熱切期望之下，終到了荃錦坳，而且，小食亭仲未休息。聽事頭講，呢d 近毅行日子，周六晚都會開夜，起碼十一二點先收。休息梳洗之後，非常感激的找到荃灣區代表Tim 出來接濟，於是就去左打甂爐，驅一驅剛少係山頂的寒濕之氣。

今次，終於發揮到power bar 同power gel 的功用。真係，食完之後，冇左那份的肌肉疲勞。至於冬青膏，搽完後睏一覺，就差唔多乜事都冇，趕走左份酸痛。

Photos:
http://picasaweb.google.com.hk/orionbill/Maclehose482007101302

 

毅行操練十四 – 麥徑 3 – 6 段

日期：10月6日
路程：麥徑 3 – 6 段
路線：北潭凹 -> 水浪窩 -> 沙田坳 -> 畢架山 -> 大埔道 -> 城門水塘
長度：37.5km
時間：9:35am – 10:17pm (12:42小時) (預算：14.5小時)
天氣：天晴 ， 27 – 32度
水(Fluid)：約3L
Walkers：Bill, Fai, Hang, YM & Jenny

Breakdown:
                                                 步行       中間休息        Main pt 休息         Total
北潭凹 -> 水浪窩                   3:15          0:00               0:30                         3:55
水浪窩 -> 基維爾                   3:37          0:22                0:02                          4:02
基維爾 -> 畢架山                   2:19          0:25                 0                               2:44
畢架山 -> 城門轉山路           1:30          0:03                0:02                          1:35       
城門轉山路 -> 城門水塘       0:27          0                      0                                0:27
Total                                     11:08        1:00                0:34                        12:42

因為一個之前果晚還要漏夜開會，一個當日早上有 presentation，一個一早安排帶水去水浪窩，所以這天一開始就只得 Fai 同 YM，其他人就在水浪窩集合。

9:35am 在北潭凹出發，奇怪地多左西人來操；一開始已經幾曬，經過之前缺水教訓，所以雖然行10km，都帶左2L水加支 Gatorade。這段路都係用輕鬆的步速，去到主要地點便作一、二分鐘小休，落到水浪窩都係12:50pm，Jenny同阿 Hang 都到左。

洗下手腳，食 Jenny 帶來的 lunch (有KFC 嘅薯蓉，麥叔叔嘅芝士漢堡，腸仔飽) 好正！食薯蓉真係一流，有 carbohydrate 又唔洗咬，放入口一吞，搞店！阿 Bill 唔知搞乜，食飽都未見人…

終於搞到 1:29 pm 先起行。又再次曬住上馬坳，不過今次大家體能明顯有提升，基本上無停過便上到去，到左聚會嶺，YM 便提出要退出操練，因為發覺左腳有 ITBS (iliotibial band syndrome) 問題，就是下山時，膝頭外側有一種好尖銳的刺痛感覺，但行番平路便沒事，上次阿 Fai 痛完今次到 YM … 行左十零k便要 quit，好唔底，但唔停止，會令傷患加重，有排唔好。這一痛，便要停操至少二星期…唉，臨尾傷！其餘四人繼續向第六段目標進發。

因為YM走左，以下回顧就靠阿 Bill 了。

首先，枝body glide 真係有用。唔會再損了。

開始進入倒數的階段，一個月，之後仲有最多兩次的長程training，希望足夠啦。不過，YM 的傷患，的確令人擔心。YM，你要加油呀，忍下手，休養下，等傷愈呀。接著下來的兩次，都好長，4->8段及3->8段，而且更要找來support幫手，真係感激萬分。

這個周六，又係一個大晴天，雖然已經入秋(中秋節都過左兩星期)，但那個艷陽也不敢輕視，曬下來，也要了你半條命。今次本應說是3 至 6 段。但我和Hang 有事要遲join，第四段插入，而Jenny 就係第四段補給，所以只有YM 同 Fai 一早係第三段出發。來到第四段，作個補給，整裝後1:30pm出發。按當日時間，這裏應該是夜行，所以不用烈日當空下上馬鞍凹的，感謝。在上馬鞍山時，剛巧有人放狗，佢地跟著我地後面好一陣，才跑回去找主人。來到馬鞍凹，都近3pm，可惜，多走一會後，YM就腳痛了，相信是ITBS，所以不得不中途撤退。而我地就繼續行程。去到沙田坳，已經6:28pm。

今天在衞奕信徑，有比賽進行，雷利長征。其中一個項目，就係去到沙田坳為終點。所以我地去到那裏時，得到好多人的支持，聽到很多的加油，真係有點尷尬。我地作了補給後，6:50pm 再出發，穿獅子山，經畢架山，過大埔公路，去城門水塘。係日間，一切都正正常常，反而在晚間就怪怪的。可能係有比賽進行，把人都吸了去，所以，係獅子山，畢架山，非常之靜。大家都知，獅子山出名多ii，所以行的時候，都保持警覺，有咩風吹草動，都提高行山杖。用了個多小時，8:15pm，上到畢架山山頂。總算鬆一口氣。正當我地行落幾級石級時，右邊草叢就發出聲響，沙沙聲的。我們立刻定住，再察看係甚麼，但不見真身，相信係狗或牛，沒有威脅。由畢架山落大埔公路，不用一小時，但後段已係馬騮地盤，雖然係夜間，相信馬騮冇夜視能力，應該會睏覺，但走過時，心都係放不下，提高警覺。一路上，馬騮就遇不上，一對對反著綠光橙光的狗眼就遇過幾次。心在想，見狗好過見馬騮。無經無險，9:05pm，落到大埔公路。休息不久，就見有人從後出現，相信都係操練中。

過了馬路，就行埋最後一段。呢段路約一小時多點點。呢段路唔難行，但最有陰影。首先，行落幾步，就有人投訴冇街燈。原來雖然係車路，但入了水塘，就冇街燈，所以我地都要開著頭燈行。平時，呢度最多馬騮，係路，係樹，係石。但今晚就一隻都唔見，情況似上次尾段被圍咁。我地一路行，間唔中有車上落，同遇到三個迷路的雷利人。另外，我地被下令了，不得四圍照…..。麥徑同衞徑係度都係相交少少，很快就分開了，所以我地又係自己行。轉入山路，直至去到上次被圍地點，以及落到燒烤場(10:17pm)，都係見唔到一隻馬騮，我地都大感疑惑。燒烤場就甚為熱鬧，不久，有人從麥行徑走出來，打個招呼，佢地都奇怪見唔到馬騮。究竟佢地去左邊，睏晒？梳洗過後，雖然走了小巴，但遇到TAXI，落荃灣食個飽後就散了。

今天空氣好差，事後聽聞空氣污染指數好高。其實，在山度，都見到同呼吸到。眼前的白茫茫，就算去到大老山，連啟德機場跑道都望唔到。另外，就係深呼吸時，條氣係唔順，會咳的，可以說係運唔到氣咁。難以想像會去到咁差…..

Bill’s photos:
http://picasaweb.google.com.hk/orionbill/Maclehose462007100602

有關 ITBS:
http://www.sportsinjurybulletin.com/archive/0168-knee-injuries.htm

ITBS Stretching:
http://www.nismat.org/ptcor/itb_stretch
http://mis_nomer.blogspot.com/2006/10/walt-reynolds-itb-special.html

 

毅行操練十三 – 麥徑 6 – 10 段

日期：9月29日
路程：麥徑 6 - 10 段
路線：大埔道 -> 城門水塘 -> 針、草、帽 -> 荃錦凹 -> 田夫仔 -> (M197) 落”顯發里”
長度：41km
時間：9:31pm – 9:16pm (total – 11′44″)
天氣：天晴 ，26 – 32度
水(Fluid)：3L
Walkers：Bill, Hang, Fai, YM(荃錦凹加入) & Jenny

Break down:
                                              步行       中間休息        Main pt 休息         Total
大埔道 -> 轉上山路            0:38         0                      0                               0:38
轉上山路 -> 鉛礦凹            2:49         0:05                0:21                          3:15
鉛礦凹 -> 荃錦凹                2:39         0:03                0:31                          3:12
荃錦凹 -> 田夫仔                2:02         0                      0:06                         2:08          
田夫仔 -> M197                  2:28         0:04                0                                2:32
Total                                  10:34       0:12                0:58                         11:44

今次再操6-10，是因為阿 Fai 在9月8日要養傷，被逼停操。而輪到YM有腳痛，只在後半部加入，所以今次內容完全來自阿Bill。

來到周六，又係操山的日子。返左成個禮拜工，來到周六，都係冇得睏多d。而且，仲要早d 起身pack 野之外，之前果晚仲要早睏多休息。再加上行來行去都係果d 地方，真係想9 Nov 快d 到，行鬼左佢。不過，唔係呢d training ，自己的體力耐力都唔會有所提升，一次過行四五十公里喎，甚至更遠，真係幾難想像。而家，睏過一覺，就乜事都冇，冇痛，冇腳軟。唔知，比賽後，仲可以keep 到呢個狀態幾耐，真係唔捨得。

呢個周六，走六至十段，因為Fai 未走過最悶的九、十，要俾佢 taste 下那個悶。第九第十段，有成21.9km，都係車路，水塘路，引水道路….，仲要黑沉沉，乜景都冇。今次約左九點，係大埔公路等，巧合地和上次起步時間一樣，9:31。行左幾步，就見有消防車，救護車，好似有人跌左落水塘，不過，見消防員慢慢咁set 繩，沒有半點緊張氣氛，再加上Fai 八卦地往下望了眼，都估那位傷者已經……。一起步就遇到呢d 野，覺得今次training 有d 野咁。

沿住金山路上山，馬騮唔多見，反而，係仲有十幾步到城門燒烤場時，就遇到馬騮群，擋係路中間，仲好惡咁兇我地，等我地行左一半，仲主動咁去包圍我地，見Jenny 手冇寸鐵就向佢衝前幾步，好彩佢地都仲忌憚我地，未有進一步行動，但都夠驚嚇了。都唔明，佢地仲乜咁惡，我地又冇超市膠袋，又唔係特登搞佢地。如果佢地再進一步進犯，我地應該點？得閒都要諗下先。落到城門水塘，約10:36。

今日天氣十分好，煙霞唔重，都望到幾遠，影相唔錯。不過，雲就沒多半點，曬，所以用水又多左。今日，上針草的人唔多，所以，都唔係好明其他人係點練習。過左針草，係上大帽山的山腰亭，本想休息一下，不過個亭就俾牛糞攻佔了，滿地都係，想好好地找個地方拉下筋都冇。停左一陣，就見有隊牛從後而來，佢地一列咁沿住車路咁行，有大有細，跟住我地行一段，仲不時在叫，直至與前方草叢的牛呼應後，再岔路而去。

約16:05，就過左針草帽，落到荃錦凹，和YM會合。佢仲帶來冰鎮生果盤，真係一流。而Jenny，就繼鉛礦凹之後，再忙於腳板修理，可真辛苦她了。往後的路，21 km的悶，行左五個幾鐘，終於捱過了。沖身，大食，呢d 當係指定動作。以前行完山，都唔會沖身，而家就習慣了，或者說，唔沖反而唔舒服。

 豐富的晚餐 (有飯，有餸，有湯，飲埋野)，一人都係41蚊！ 

Bill’s photos: http://picasaweb.google.com.hk/orionbill/61020070929

 

毅行操練十二 – 衛徑八、九段

日期：9月22日
路程：衛徑八、九段
路線：大埔頭 -> 九龍坑山 -> 八仙嶺 -> 大尾篤 (W101 – W125) + 3km 落山
長度：15km
時間：9:38am – 3pm (total – 5.5 小時) (預算：7hrs)
天氣：大致天晴及乾燥。氣溫：26 – 31度。濕度：55 – 70%
 天文台大埔氣象站資料
水(Fluid)：3L
Walkers：Bill, Hang, YM

因為今日阿Bill同阿Hang都要做節，要趕在5點前落到山，所以揀條唔係麥徑的短操路線。行九龍坑山、八仙嶺係因為貪佢多樓梯，短得黎都操到下四頭肌。

九點半喺太和出發行過去九龍坑山起點，我地早前已領教過衛徑d指示，於是一早喺中原地圖揾定資料（個郊遊圖比例太細，村裏面d路畫得唔清楚）；按著放大左嘅路線圖，好順利地便進入九龍坑山起點。一開始到頂都係樓梯，甚少斜路，而我地今次要行得比平時快，所以開頭呢段都幾“索”氣。再加上今日都幾曬幾熱又乾燥，一開始已經要不停飲水，但飲極個口都仲係乾，慘啦，帶左3L，好“mund”水。

用了2小時便到了鶴藪水塘燒烤區，阿Hang話今日要奉行 minimal stop 嘅宗旨，所以只停左幾分鐘，攞左d野食出黎就走，邊行邊食也！從這裏開始便上屏風山；以往都是從這邊下山，今次第一次上山，感覺上比落容易，級雖高，但起碼無落時“dung”到個膝頭咁傷！

到頂後停了數分鐘，繼續前面嘅黃嶺、犂壁山、八仙嶺… 之後嘅路一直到純陽峰先停低，因為 YM 發覺無哂水！幸得二位兄弟一人“施捨”250ml 水，加上餘下小半樽 Gatorade 先能行畢全程，無渴死…

2點已經到左仙姑峰，落埋山都係3點，太好了，在大尾篤洗手間抹下身、換過件衫後，當然要去醫肚！出番去大埔火車站商場，去左許留山，一人食左個好 yummy 嘅甜品，便分道揚標了！

今次嘅經驗話，停小d並且停短d係得嘅，而且食野係唔洗停低食（但只可食住上，食住落山會卜死），而如果路線長，當然唔可以急行啦！我地仲未夠班喪跑呢！

Bill’s photos: http://picasaweb.google.com.hk/orionbill/WilsonTrail20070922

 

毅行操練十一 – 麥徑 1 – 4 段 (前50km)

日期：9月16,17日
路程：麥徑 1-4 段
路線：北潭涌 -> 沙田坳 (M000 – M101)
長度：50.5km
時間：(16th) 2:07pm – (17th) 8:45am (total – 18′20″) (預算：16hrs)
天氣：大致天晴及乾燥，但有煙霞。局部地區有驟雨 。氣溫：26 – 30度
水(Fluid)：3L (1-2段) + 3+ L (3-4段)
Walkers：Bill, Hang, Fai, YM, Angus & Jenny

Break down:
                                                            步行+間中休息        Main pt 休息         Total
北潭涌 -> 東壩亭                                       2:03                    0:07                          2:10
東壩亭 -> 西灣士多                                   2:22                     0:18                          2:40
西灣士多 -> 北潭凹                                   2:31                     0:20                          2:51
北潭凹 -> 水浪窩                                       4:14                     0:26                          4:40
水浪窩 -> 基維爾營車路                           4:55                       0                              4:55
基維爾營車路 -> 沙田坳(M101)             1:04                        0                              1:04
Total                                                         17:16                   1:04                         18:20

經過上幾次操練，我地終於可以嘗試破50大關啦！因為 Fai 星期六唔得，唯有叫大家請一天假，操星期日同一。今次好人齊 – 4個 walkers 加 2個 “porters”。

星期日2點多便在北潭涌出發，因為已是週日下午，原本應該會幾熱鬧的地點，看來都有點冷清。入萬宜條路，好多的士出入，多數都是空車入，載番 d 人出來。過了西灣路的 intersection 一陣，有架紅的駛到我地旁邊停下，裏面坐著三名外籍人仕，探頭出來問我們 “Shing Mun” 在那裏，開頭以為聽錯，再問一次，真係問“城門”！天呀！這裏是萬宜！個司機知道他們要去“麥理浩徑第七段”，為何車了他們來這裏？後來他們問咁麥徑二、三段點去，唯有指他們去西灣路個吹風坳開始… 真係 Good Luck to them! 我們說笑話，如果真係出番城門，咁個的士佬呢個星期可以嘆世界啦！

稔住開頭行慢d，用了 2 小時多 d 便去到東壩尾。小休一會，便過浪茄，上西灣山、落士多補給。中間作些小休，拉多點筋，最重要是讓阿 Fai 對腳唔好太操勞，免得再受傷。在士多補給的 15 分鐘裏，阿婆竟能夠煮好餐蛋麵，加上阿 Gus 能夠食完，犀利！在這裏的補給品真是可以任人“魚肉”！15蚊支 Gatorade都要比佢！無計… 因為阿Gus應承左做 Porter，所以好好人地幫 YM 揹了 1L 水加 1支 Gatorade 去北潭凹！

離開士多已經天全黑了，第一次摸黑去鹹田灣，唔太認得沙灘的路，都是認住方向來行。過了鹹田灣當然一腳沙。AA 陳介召有個好 d “dun” 沙的地方，就在大浪村轉上赤徑前有 d “膊”位可以坐得舒服些少 (如果坐落地下起身時好易抽筋)，但d “膊”位原來在那些村屋前面，要面朦朦同d阿哥借個便來坐，不過d阿哥好好人，知我地操毅行，十分樂意借個地方比我地。多謝哂！”dun”沙期間，YM帶在樽爽身粉，“沈”喺腳上容易除沙。話雖如此，仍然用了15分鐘做呢件事，阿 Bill 話下次都係 “lop”膠袋。不知阿 Fai 是否開始有倦意，竟差點將對襪用來抹面！

離開大浪村，用了差不多 1.5 小時便到達北潭凹 ，(阿Gus因為只預行一、二段，所以在這裏離隊，)剛好趕上尾班 94 號巴士出西貢。其餘的人，為了應付第三段，都在這裏食定 Power Gel、 Cataflam… YM更食了有 2X Caffeine 的 Power Gel 提提神。

已經是第三次夜行第三段，所以行起來已駕輕就熟，今次真係要慢上，因為經過之前果廿幾 K，點都有 d 攰，其次還有第四段要行，YM 著番對行山鞋，行在這段碎石路多的山徑，完全沒有拗柴的心理壓力，見路就行，好爽。無驚無險地便落到水浪窩，這次比上二次行長左時間，用了4個多小時，落到水浪窩已是凌晨二點。因為唔想阿 Fai 操傷腳，便在這裏「趕」他回家。Call 左架的士好快就到，他上車後，餘下四人繼續向目標進發。

由水浪窩上馬坳都無停過，慢慢行都是用了1小時50分。原本一直都是無星無月的天空，現在一抬頭，竟然見到不少星，感覺上d老朋友又出現了！行到這裏，腳板好攰，阿 Hang 在北潭凹”o拍”果二粒 Cataflam 竟然生效，佢話個膊頭無乜痛了，唉，點解今次到YM無效嘅？唯有每次小休時不停拉筋 (可惜拉不到腳板筋！) 。

用了差不多6小時才行到沙田坳士多，已是8:45am，士多竟然未開門！無得食早餐… 唯有快趣行落竹園，沖涼先。點知去到竹園個體育館正進行大清潔，無得用，問到原來斧山道運動場有，於是打的過去。

Jenny 同 YM 一入到更衣室，第一件事便是 check 下對腳，Jenny 一除下對襪，便看到雙腳板起了起馬10個水泡！佢真係好掂，出哂水泡都可以捱50K…

沖完靚涼後當然要醫肚，行過去荷李活廣場已是10點多，入左間聯邦酒樓，剛好趕得上飲最尾班早茶，相信我地都無乜機會在平日的早上嘆早茶！個個都話似過緊退休生活咁！因為好肚餓，三扒兩”砵”叫了10幾樣點心，食飽後還看了一陣報紙… 幾嘆！埋單一計，每人食了差不多80大元！早茶4個人食成300幾蚊都幾犀利！

   食到一枱點心，之後還嘆下報紙，多寫意！

回家路上已大昏迷，幸好沒有坐過龍…仲識得下車…

50km… 我地又向毅行目標邁進一步了！

 

“行”山都係要著行山鞋

記得7月12日 post 左個 news 話買左對 Mizuno 跑鞋。的起心肝試左5次咁多，但始終人地係用黎跑，我用黎行，腳板承托力唔夠，行得長腳板好疲倦，兼且包夥腳眼位置唔足夠，腳無力時就好易拗柴，行起來非常唔得心應手。於是都係死死地氣買番對行山行。重就重 D 啦…

雖然曾經話過唔再著 Montrail 鞋，因為覺得佢貴，個鞋底好快蝕，但只因著慣左，鞋底雖然蝕得快，但無可否認爪地性能好，又啱我腳型，最終都係買番對 Montrail…

 Montrail Continental Divide

今次呢個鞋底比前果隻硬 D，希望果 D 藍色粒粒唔好 “lut” 出黎就得啦…

仲有，果日買果支 Jacko Carbon 行山杖，用左4、5次之嘛，過去果次操練，就比我搞到個彈弓 stuck 左，大力 D 擰，下枝分了家！唉，咁都得！之前果支 Lekisports，用左 5 年有多，去完尼泊爾，行左2次毅行，經歷無數操練，先在06年毅行完 (仲要係比“焦急”隊員 abuse 完後) 才壽終正寢！